ምንም ሆሄ ብትሆን ከሌሎች እንደ አንዱ
ብቻህን እንድትቆም አንተን ሲያካብዱ
"ፐ-ፐ-ፐ ፐፐፐ" እያሉ እየጠሩህ ሁሉ
ከሌሎች አናት ላይ ምነው መሰቀሉ???
(ን)ዋን ግን ተውልኝ
ውረድ ካናቷ ላይ
አንድነትን ንቄ
ብዙነትን ላሳይ::
ለሰውም አልስበክ እኔ እንዲህ ነ(ኝ) ብዬ
ካናቷ ላይ ስትወርድ አሽቀንጥሬህ ጥዬ
እኛ እንዲህ ነ(ን) ልበል በሰው ተከልዬ
ራስ ወዳድነት አይጨፍር በላዬ::
ግና ግና ግና
ግና ግና ግና
ያንተ ውጤት ሆና፣
እንዳንተ ብቻዋን መቆም ያልተሳናት
አንድ ፊደል አለች (ና) ነው የምንላት::
ካንተ አይታ ነው መሰል ላፈንግጥ ትላለች
ብቻዋን ለመቆም ትፍጨረጨራለች::
እባክህ አንተ ፐ፣
ከ(ን)ዋ ላይ ወርደህ መቆምህ ካልቀረ
(ና) ላይ መቀመጥህ መላ ከፈጠረ
እ(ኛ)ነታችንን ታጠፋለችና
ብቻዋን እንዳትቆም አርጋት እስቲ ናና
ጠፍቷል ከፊደላት እንዳንተ ገናና::
